Our Gifts

Verstaan ons werklik U genade?

Hoe groot is U genade nie, vir die mens!

In my hart vlam ‘n brandende wens.

Mag elke mens deel hê aan U genade.

Elke vrou, elke kind, elke gade.

Weet ons, wat dit is om U genade te ontvang?

Of weet ons net van klaagliedere en mymerende sang?

Sien ander U genade in ons oë,

of loop ons swaar en gebukkend terneer geboë?

Prys ons U in ons harte vir U genade elke dag?

Of wandel ons steeds in die gebrokenheid en nag?

U, son met sy genesings strale skyn elke dag vir ons.

Laat hierdie wete ons hartsnare nog bons?

Elke dag plant U saadjies van U genade,

dag vir dag, week vir week, maand vir maand en in jare.

Hoe ontvang ons U genade, U onverganklike saad?

Deel ek dit nog met ‘n ieder en elk, asook my lewensmaat?

Here, help my om my vlerke te kan sprei,

sodat ek die sout van U koninkryk kan versprei.

U sout bring heling en genesing.

Al hoe wyer maak U die kring.

Deur die donker wolke wat om die aarde gepak is,

kom breek U met U lig en genade deur, dis gewis.

Sien ek U lig, U strale in die nood van my siel?

Bring U genade my weer op my knieë om voor U te kniel.

Staan ek nog in verwondering voor U, o Heer?

Of maak die splinters en skerwe in my hart nog te seer?

Weet ek, dat U genade is in my hart?

Waarom is ek bang en verward?

U genade is so geweldig groot,

gee ek dit vir hulle in nood?

Verlep ek om die soete heuning van U genade uit te deel,

of het ek toegelaat dat die gebroke wereld van my kom steel?

U genade is rein en skoon.

Vir elkeen wat daaraan vasgryp, bring dit soveel loon.

U genade is nie net vir my,

want U wil elkeen van die kettings van slawerny bevry.

Toonset ek nog klanke van blydskap,

oor U vermenigvuldigende liefde en genade?

Of probeer ek self nog die stukkies van my lewe,

aan mekaar te lap?

Here, hoe verlang ek nie na daarna,

dat elkeen biddend, pleitend en smekend na U genade sal vra?

Dat die begeertes en stuurwiel van hul hart,

nie deur verleiding, hul sal dompel in rou en smart.

Here, gee dat hul sal opstaan uit die as.

Dat U deur U tasbare genade,

Die trane van hul verrimpelde gesigte sal was.

Here, kom skyn weer in hul blinde en moë oë.

Here, mag die harp, lier en tamboeryn,

van U genade weer in hul lewe, ingeweef word met U vingers so verfyn.

En mag u genade, soos ‘n magtige loflied in hul oprys,

En u heerlike en grote Naam vir ewig prys!

Deur: Marieke Zeevaart