Our Gifts

Die sluier van skaamte, is vrese.

Kom ons gaan staan vandag voor die spieël, van ons eie spieëlbeeld. Hoe voel jy as jy na jouself kyk in die spieël? Voel jy selfbewus? Soek jy na al die voorkoms foute? Veroordeel jy jouself? Is jy hard op jouself? Wil jy liewers nie kyk nie?

Ek wil julle aandag vestig op die woordjie: “selfbewus.” Wat beteken dit om “selfbewus” te wees? Kom ons breek die woordjie in twee dele op, self en bewus. Die woordjie “self”, is ingestel en gerig op jouself. “Self” gaan oor jou, en oor alles van jou en wie jy is. “Self”, dring deur tot jou diepste wese. Die woordjie “bewus” verwys na jou gewete, en jou gewete is waarheidskennis oor jou, wat sentreer in jou gedagtes, vanuit jou hart. Jou bewustheid of bewuswording van jouself, lei tot ‘n diepe ondersoek van jouself, en dit lei tot jou gevoelens. Hoe “voel” ek oor myself? Nog meer, wat dink ek van myself? Weereens vorm jou gedagtes en gevoelens, die sentrale punt waar rondom jy draai.

Neem ‘n oomblik, en teken ‘n prentjie van jouself, in jou kop. Die prentjie wat jy geteken het, kan jou oë oopmaak vir jouself, en hoe jy jouself sien, met verrassende gevolge. Hoe lyk jou prentjie? Lyk jy oorgewig, of is jy rietskraal? Lyk jy vol plooie? Lyk jy groot, of lyk jy klein? Het jy al jou swak eienskappe by geteken, of het jy juis dit verbloem met jou kuns talent? Het jy ‘n “colgate” glimlag, of is jou glimlag slegs ‘n enkele streep? Staan jy plat op die grond met jou voete, of sweef jy op jou tone in die lug?

Baie van hierdie dinge wat ek nou genoem het, het jy seker nog nooit besef nie? Sommige dinge prikkel jou lag spiere, maar ander laat jou voel jy wil daardie papier vat, en dit in ‘n duisend stukkies opskeur, dit weggooi en daarvan vergeet...,want miskien voel jy vergete in die wêreld, en voel jy skaam vir jouself...

Hoe voel iemand wat skaam is vir homself? Weer wil ek jou hart prik met die woordjie “selfbewus”. Skaamte gaan ook gepaard met woorde soos; miskenning, identiteitsloos, minderwaardigheid,  swak selfbeeld, verwerping en vrese.

Kom ons ontbloot “skaamte” nog meer. Hoe tree iemand op wat skaam voel oor homself? Hy onttrek hom van almal, hy gaan sit eenkant in ‘n hoek, en hy verberg homself liewer. Hoe voel ‘n persoon wat skaam voel? Hy voel miskien verneder, hy voel dalk ‘n bespotting, hy voel verwerp of verstoot. Waarom sal ‘n persoon wat skaam voel oor homself, hom heeltemaal onttrek? Die diepere antwoord hierin, lê in die persoon se eie hart op gesluit. Die persoon trek homself terug en onttrek hom, juis omdat hy skaam is vir homself. Waarom sal hy dan skaam wees vir homself? En nou prik ons die speld reg in die middel van so persoon se wese. Die skaam persoon is bang! Waarom word ‘n skaam persoon dan bang, of wat is sy vrese dan? Juis onttrek die persoon homself, want die situasie oor homself het iets geprik in hom, wat hy nie wil wys nie, en wat hy liewers wil verberg. En uit vrese van ontbloting van homself, ontrek die persoon hom dan. Waarom maak ontbloting van onsself, ons so bang!

Trek jou bybel nader en blaai weer terug na Genesis toe. Genesis 2:25 sê: “ Hulle twee, die mens en sy vrou was kaal, maar hulle was nie skaam nie.” Dis interesant, want voor die sondeval in die wêreld gekom het, was alles baie goed en uniek, en die heel belangrikste is, dat daar nie “skaamte” was nie. Nou is jou volgende vraag vir my: “Waarom was die mens dan nie skaam om naak te wees, voor die sondeval nie?” Die antwoorde hierin lê in God se unieke skepping en Sy skeppingswerke op gesluit.

Eerstens die mens se oë het nog nie oop gegaan vir sondes nie, en die mens het geen begrip en kennis van die sondes, en naaktheid gehad nie.  Die mens het dit nie nodig geag om hulself te bedek, of dat hul dit nodig gehad het om iets of dinge weg te steek nie. Alles was oop en bloot, rein, mooi en heilig na God se ewebeeld. Dit was die manier hoe God hul geskep het, en dit was vir hul mooi, net soos wat hulle vir God mooi is. Ook het hulle na mekaar gekyk, deur die oë van God se volmaakte skepping.

Kom ons laat val die swart sluier van die sondeval oor die wêreld. Wat beteken dit dan, om na die sondeval skaam te wees? Na die sondeval voel ons in ons skaamte vir onsself ontbloot, ons voel onwaardig, ons voel innerlik naak, ons voel onbekwaam, en ons voel onbevoegd. Ons voel ook nie goed oor onsself nie, en ons voel minderwaardig in alles. Een woordjie staan vir my uit hier, en dit is “minderwaardigheid”. Skaamte vir jouself, is minderwaardigheid in jouself. Kom ons doen die letterlike som hierin. Skaamte is gelyk aan minderwaardigheid. Nog ‘n diepere betekenis vir skaamte, is dat skaamte vir jouself ‘n sondige minderwaardigheids gevoel is. Hoekom sê ek, sondige minderwaardigheid? Laat ons bietjie dieper delf in die wortels of oorsake van minderwaardigheid.

Minderwaardigheid is gesetel in verwerping, molestasie, emosionele mishandeling, fisiese mishandeling, verkragtings, aanrandings, geweld, leuens en so voorts. Kan jy sien hoe die vrese van minderwaardigheid en skaamte in jou setel, as gevolg van sondes of sondige gebrokenheid. Een van die grootste sondes in skaamte vir jouself, is verwerping. Verwerping plant skaamte vrese in jou.

Hoe tree ons op, as ons skaamte vrese in onsself ons oorval. Ons wil ons bedek, ons wil wegkruip, ons wil onsself wegsteek, ons trek ons self terug van mense, ons wil onsself verbloem, ons gooi onsself toe onder werk, ons onttrek ons van die samelewing van mense. Kan jy sien hoe die vrese van skaamte, jou sondige gedrag ook bepaal?

Nou wil ek die oë van jou hart, nog groter oopmaak vir jouself. Jou skaamte vrese steel ook by jou. Hoe so...? Deurdat jy te bang is om uiting te gee aan jou unieke talente en gawes wat God in jou geplant het. Dit lei ook daartoe, dat jy nie jou volle potensiaal in God kan uitleef nie. Jy kan ook nie in jou unieke identiteit na God toe groei nie, want jou gedrag word bepaal deur die skaamte vrese in jou.

Kom ons bring God se lig weer, oor hierdie sluier van skaamte. Waarom is dit sonde vir God, om minderwaardig of skaam te voel oor jouself? Eerstens, moet jy onthou, dat God het jou baie goed en mooi geskep, Hy sê dit self in Sy woord. Genesis 1:31: “Toe het God gekyk na alles wat Hy gemaak het, en dit was baie goed.” God het ons uniek na Sy beeld en gelykenis geskep. Ons het geen tekortkominge in God. Alles wat God skep, is mooi, uniek en heilig, want ons God is uniek en heilig bo alle dinge, wesens en skepsels. God is die Skepper van alle dinge, en nog meer God is in beheer van Sy skepping. God is ook jou Skepper, en God is ook in beheer van jou.

As ons minderwaardig en skaam voel oor onsself, bevraagteken ons God se skepping in ons. Ons bevraagteken ook God se skeppingswerke in ons. In ons skaamte ag ons, onsself nie waardig nie, en daarom ag ons, onsself ook nie waardig in God nie. Elkeen van ons is na God se beeld geskape, en as ons, onsself nie waardig ag nie, verwerp ons die beeld wat God in ons geskape het. Genesis 1:26: “Toe het God gesê: “Kom ons maak die mens as ons verteenwoordiger, ons beeld, sodat hy kan heers oor die vis in die see, die voëls in die lug, die mak diere, die wilde diere en al die diere wat op die aarde kruip.”” Ons is na God se beeld geskape, en as ons minderwaardig of skaam voel oor onsself is dit sonde, omdat ons God se beeld en skepping in ons skaad.

Waar lê die hoop in God agter die sluier van ons skaamte. Ons moet deur God se woord in kennis, geloof en vertroue groei na God toe, dat God die sluier van van ons skaamte en vrese sal verwyder. Ons sal nie meer bang wees vir mense, as ons in vertroue na God toe groei, want ons sal weet wie Hy is vanuit Sy woord. Ons sal nie meer bang en skaam voel om identiteitsloos te voel nie, want ons het ‘n unieke identiteit in God. Ons sal nie meer vrese en skaamte van minderwaardigheid in ons hê nie, want ons is waardig in God, omdat ons Sy skeppingswerke is. Ons vrese van skaamte sal vervang word, met ons liefde vir God. Ons sal nie meer bang en onbekwaam voel in onsself nie, want ons groei deur God se woord daagliks, in ons unieke talente en gawes na God. Ons sal nie meer skaamte van onbevoegdheid hê nie, want deur God se woord ontdek en ontwikkel ons, in ons volle potensiaal vir God. Ons sal nie meer naak en leeg voel in die wêreld nie, want deur God se woord groei ons in reinheid en heiligheid na God.

En wanneer ons in al hierdie dinge na God toe gegroei het, word ons sluier van skaamte en sondige vrese, vervang met ‘n wit deurglansde, rein, bruids sluier in Hom.

Deur: Marieke Zeevaart